விலையுயர்ந்த செல்போன்

விலையுயர்ந்த செல்போனை

விளையாடி முடித்த கையோடு
தொடவந்த தம்பியை அதட்டிய என்னால்,

மாவு பிசைந்த கையோடு எடுக்கவந்த
மனைவியை முறைத்த என்னால்,

அடுப்புக்கரியொட்டி வந்த
அம்மாவிடமிருந்து பத்திரப்படுத்திய என்னால்,

வியர்வைவடிய வந்த அப்பாவிடமிருந்து
விலக்கிய என்னால் முடியவில்லை.

என் பச்சிளம் குழந்தை விளையாடி உடைக்கையில்
வாய்திறக்க.

மேல் கூறிய சுற்றமெல்லாம்
இதை பார்த்து எனைச் சுற்றிநின்று சிரிக்க
அழும் என் குழந்தை கேட்கும் பொழுதினில்
மறுபடியும் கொடுக்கிறேன்.
என் விலையுயர்ந்த செல்போனை
இல்லை! இல்லை!
என் செல்லம் உடைத்த செல்லபோனை.